السوشيال ميديا علمتني التبلد وشخصية سنو وايت أثرت عليّا.. أبرز تصريحات ريهام عبد الغفور مع راديو إنرجي
✍🏻كتبت : الاء احمد
حلت الفنانة ريهام عبد الغفور ضيفة برنامج طريق تالت الذي تقدمه المذيعة إيناس الشواف، على راديو إنرجي 92.1، متحدثةً عن العديد من كواليس أعمالها وتطرقت لحياتها الشخصية.
حمايا من أهم الأشخاص اللي غيرت تفكيري وخلتني أتعامل في أمور الدين بنظرة متسامحة وأن الأساس هو المعاملة وأني أؤدي بالعبادات بدافع الحب في ربنا.
أي تجربة حياتية بتعلم وتفرق سواء الجواز أو الطلاق أو الأمومة أو النجاح أو الفشل، كلها حاجات بتغيرنا حسب كل حد فينا بيستقبلها إزاي.
بحب شخصية سنو وايت، ويمكن هي اللي أثرت عليّا في حبي للحيوانات، ومن أدواري اللي أثرت فيّا وقت ما عملتها الرحلة ولا تطفئ الشمس، طلعوا مني بتعب كانوا هيجيبو لي اكتئاب.
ريهام عبد الغفور من مسلسل الأصلي
– خلفت ابني الكبير وأنا لسه صغيرة فالعلاقة بينا صحوبية وهو اللي بيديني رأيه لأنه متطور عني، الولاد عامةً بيعلمونا إن الأولوية ليهم ويبعدونا عن الأنانية.
– بنعتقد إننا هنمشي طريق مختلف عن أهلنا بنلاقي إننا زيهم، كنت بعتب على أمي في قلقها علينا، بقيت قلوقة أكتر منها، ومن والدي أخدت الصبر والهدوء والرضا بالفعل مش بس كلمة.
– السوشيال ميديا شر لا بد منه، مبحبهاش ولكن اتعودت عليها، وقت الشغل بتابع ردود الفعل وأحيانًا بشد الفيشة وأبعد، علمتني التبلد من كتر التدخل في خصوصياتنا.
والدي ديمًا يقول لي الواحد مش هيسيب إلا السيرة وبحاول ألتزم وأحافظ على اسمي واسمه، وإن يبقى أثري مش بس عن شغلي لكن عني كإنسانة.
شغلتنا متعبة للأعصاب ولازم ديمًا تشك في نفسك لأن الثقة الزيادة مش هتطلع أحسن ما فيك، الإحساس ده فيا زيادة، وديمًا ببقى قلقانة ومتوترة وده غلط بس بيخليني أقدم أكتر مما أقدر.
حياتي مليانة طريق تالت، مثلًا كنت في تجارة إنجليزي، روحت فرح بالصدفة بقيت ممثلة، وأنا طالبة روحت اشتغلت مضيفة طيران اتعرفت على زوجي الأول وسيبت الوظيفة.
