كتب .. ايمن نور الدين
بالنسبة لعمار يااسكندرية اللى اتغيرت لعمار ياسعودية .. والدنيا اللى قامت ومقعدتش دى
عايز أسال سؤال .. هو آخر حفلة الحلو اتطلب فيها فى مصر كان امتى عشان انا ناسى ؟
آخر شركة انتاج فى مصر عرضت عالحلو شغل كان امتى ؟
عشان انا مش فاكر
طب حد يعرف الحلو بياخد من النقابة كام ده لو بياخد
الحقيقة انه كان بيتم التعامل مع الحلو على انه خلاص انتهى
وحفل السعودية هى اللى بينت ان الحلو لسه قادر يشتغل ويغنى
الحلو حرفيا .. كان معذور ماديا وعنده مسئوليات ومصاريف علاج و بصراحة الفلوس اللى خدها من تركى دى جم فى وقتهم .. فحب يجامل بكلمة فى اغنية زى المطربين مابيعملوا فى الأفراح
خلينا احنا فى حمو وشاكوش وبابلو وويجز وكزبرة وعفروتو وو
و سيبوا الناس تاكل عيش
وبعدين دى السعودية مش اسرائيل
عادى .. ماكفرش يعنى
وبعدين دى اغانى مش قرآن
هو احنا لا بنرحم ولا بنسيب رحمة ربنا بتنزل
وعلى رأى سيد حجاب وبصوت الحلو نفسه
ومنين بييجى الشجن .. من اختلاف الزمن
الحلو بقاله سنين عايش فى شجن
ربنا يكفينا ويكفيكوا شر اختلاف الزمن .
