اقتراح لكنيسة هليوبوليس : 

كتب دكتور/  كريم حسين

الليلة و انا نازل من المترو في محطة هليوبوليس ، وهي محطة كبيرة ، لقيت سيدة كبيرة في السن في حيرة تطلع منين، و طبعا السلالم صعبة عليها لأن سلم الكهربا كان مقفول ، فشاورتلها علي مكان الاسانسير ، وقلت في نفسي انتظرها تطلع معايا و اطمن عليها .. و فعلا شرحتلها حقها تستخدم الاسانسير ، و لما خلصنا الأدوار قلتلها رايحة فين قالتلي الكنيسة ، شاورتلها علي المخرج لأن هليوبوليس ميدان كبير جدا ، اخاف اذا خرجت غلط مش هتعرف تعدي الشارع ، فقالتلي معلش ممكن توصلني للكنيسة .. قلتلها طبعا .. و فرحت برزق ربنا لعمل انساني ..

في الطريق تحكيلي أن قريبها اللي قرر يهاجر توفي و هي كانت خايفة عليه و رايحة الكنيسة للعزاء ..

بعدما وصلتها حبيت اكتب الاقتراح ده .. لأني عارف أن الكنيسة منظمة و فيها خدمات اجتماعية كبيرة و فيها فريق كشافة من الشباب و البنات ..

الاقتراح أن طالما مواعيد العزاء معروفة .. و اكيد فيه ناس كبيرة في السن بتيجي من بعيد لكنائس كبيرة زي هليوبوليس .. ممكن كشافة الكنيسة يعملوا مناوبات في محطات المترو جنب الكنائس بحيث يرشدوا كبار السن .. وحتي في اعياد المسيحيين .. و ممكن اكلم وزارة النقل و إدارة مترو الانفاق اوصلكم بيهم ..

الحمد لله علي مدار سنوات كان لي مبادرات عملتها مع السكة الحديد و المترو سواء إفطارات رمضان للناس أو توزيع الهدايا في اعياد المسيحيين للاطفال في محطات المترو جنب الكنائس ..

و الأهم هو سلامة كبار السن .. لأن الطرق التقليدية اتسعت و اصبحت سريعة .. و فقدنا جيران و اصدقاء في حوادث سير .. ربنا يحفظنا جميعا ..

في ذكري مولد النبي عليه الصلاة والسلام استشعر قول الله سبحانه و تعالي ” وما أرسلناك إلا رحمة للعالمين” ..

صدق الله العظيم ..

شكرا الأم إيفا علي الفرصة الطيبة .. و خالص التعازي ..

و كل عام و أنتم بخير ..

#الحضارة_الخضراء